Benjamin Moloise zela eta

1985eko urriaren 16a

Gabriel Aresti bizirik balego

poema bat egin liezaioke

ostiralean urkatuko duten

Benjamin Moloise beltzari

Esango luke, agian,

polizia bat hiltzeagatik baino

bere herria defendatzeagatik

dutela urkatuko

Esango luke, ziuraski,

poeta izateagatik baino

bere arrazaren eskubideengatik

dutela zintzilikatuko

Gabriel Aresti bizirik balego

ez nukeen, apika,

poema bat idatzi izango,

baina Moloise berdin dute hilko

1985eko urriaren 18a

Ahots kasik negartiz, lokutoresak esan du gaur Benjamin Moloiseri bizia kendu diotela: beltza, poeta eta hogeitamar urtetakoa zela. Irudi luke horregatik kendu diotela bizia...

        Politiko zibilizatuek «gertaera kalifikaezin» gisa izendatu dute hain kalifikazio errezekoa izanik. Guztiak, mindurik baino, eskandalizaturik zeudela manifestatu dute. Baina, zergatik ote daude eskandalizaturik?

1985eko urriaren 19a

Poeta izatearen abantailak:

urkatzen zaituztenean, mundu guztia larritzen da; berdin du zure aurretik seirehun joan badira. Bothak ongi ikasiko zuen irakaspena: aurrerantzean ez du poetarik urkatuko, ez behintzat aurretik beste seirehun urkatu baino lehen. Iraultzaile eta borrokalariek ere, espero dezagun ikasiko zutela zerbait: ez dela nahikoa poeta izatearekin, jakinarazi egin behar dela, alegia.