Juan Gelman

euskaratzailea:

Joxerra Egiluz

Rue des arts eta apiriletik igarotzen naizen bakoitzean

«fontanares» zigarroen usaina dago

pareta ostean erretakoena / zeruaren azpian makurturik /

eskuak pagoda artega bailiran

errauts motela egunaren argitik babestuz /

eta rue des arts-etik igarotzen naizen bakoitzean

ana ikusten dut pareta osteko zelaitxoan /

begiak apirilez beterik / adiskide suminduz / nabar more

kolorez /

arrainez beteriko begiak / batzu eguzkien antzera sutan /

beste batzu euritan / begi horiek

arbola / aireari eutsiz beti erortzear ziren lumen jaraunslea / ozta-ozta utzitako txoriñoen epeltasuna

gordetzen zuten bi / arbola ebaki berriak ziruditen / eta begi horien inguruan /

mei-lan-fan-en perla kolore bereko laku bat zegoen /

nire beldurren faboritoa /

mei-lan-fan-ek buruan hazten zituen perlak

zenbait gautan argia izan dadin /

gaurko honetan bezalaxe /

arima-ikasleen antzera arima besapean tolestaturik /

apiriletik igarotzen naizela / ana ikusten ez duen begirik gabeko hiritik /

eta hiriak ez ditu ikusten haren neskatxa titiak irteten hasi

berriak

eta dardarka nire adineko zazpi urteek orduan

dardar egiten zuen moduan / txoraturik

hainbat klarin bilustu / hainbat gloria/ hainbat desolazio /

hainbat alaitasun tristerengatik / zer izan?

inorenak ez ziren zelai horiek nehor ere entzuten ausartzen

ez zena!

lehen hazi horiek milaka legioren antzera

norberaren kontra jaurtikiak!

edertasun hori / ni neu barruan / garaipenik gabekoa!

gurdiak / emakumeak / haurrak /

herrialde batetik bestera arrastaka eramanak/ zure

edertasunetik nire hilzorira!

igaroko den iragan guztira!

eta noiz alderatuko duzu zure ontasuna edota zure destaina

heriotza berandutzeko

behin «fontanares»ak erre nituenera?