Mikel Belardi

—Heriotza—

Giltzapean bizitzeaz at

Heriotzarekin ere bizitzera

Ohitzen ari gara

Posible izanen ote den

Pakean egon baita heriotzarekin?

—«Muerte natural»—

«Muerte natural»a dela diote

Zertifikatu medikuek

Ez al dira konturatuko

Zortzi urte hemen barruan

Jada, herio mota bat denik?

—Eskaratzea—

Herrera kartzela izatetik

Eskaratzea izatera pasa da.

Denok itxoiten

Ea zein den hurrengoa.

—Urruntasunean—

Urruntasunean galdurik zu

Bakartasunean ni

Egun ta gauak

Bukaezinezko ibaiak.

Luzeegiak,

Luzeegia urruntasuna

Gogorregia bakartasuna

Itxurakeriazko mundu honetan

Zabortegiatik zehar

Zirrikatzen

Zure irudiaren oroitzapena

Lili bat

Argi distiratsua

Iluntasun nardagarri honetan.

—Arras berdina—

Goizean begiak ireki

Esnatu

Ta jakin ezbairik gabe

Gaurko eguna atzo bezalakoa izanen dela

Atzo herenegun bezalakoxea izan zen gisan.

Oheratu gauean, aldez aurretik jakinda

Biharko eguna ere arras berdina izanen dela

Hau al da bizitza?

Bizitza, non ez dudan edukiko ezta

Kasualidadez ere

Enkontru ustegaberik

Non ez naizen topatuko begi ilun horiekin

Non irudi susmagaitzik

Ez duten lekurik.

Bizitza ala bizi hotza ote den hau?

Eztakit, eta ez dut jakin nahi

Dakidana bakarrik hauxe da:

Hau dela ene bizitza

Ez gehiago, ez guttiago.

—Malkoak datozkit—

Malkoak datozkit

Zure gorputz ezezaguna

Muxukatu ez dudalakotz

Ez dut muxukatu zure gorputz ezezagunik

Eta horrexegatik diot:

Malkoak datozkit.

Eta ene malkoek zure ezpainak bustitzen dituzte

Nereak lehorrak daudelako

Bai, lehorrak zuretzat.

   Hainbeste maite zintudan bezala

      Ez dut gehiago maitatuko

         Utz nazazu pakean

            Ene bakartasunean

               Gure amodioak, ibai baten antzera

                  Adio esan digulako.

Eta ene malkoek zure ezpainak bustitzen zituzten

Nereak lehorrak zeudelako

Bai, lehorrak zuretzat.