L I T E R A T U R   A L D I Z K A R I E N
G O R D A I L U A

 

 
 

                   - Orrialde nagusira itzuli
                   - Txortan aldizkaria
                   - Ale honen aurkibidea

                   - Ale honi buruzkoak (azalaren irudia eta fitxa)

Aurreko artikulua— Txortan-3 (1985-udaberria) —Hurrengo artikulua




 

 

Poemak

 

Jose Luis Otamendi

 

Keramikazko animaliak egunsentian etzanda

goiza urratzen hainbat eztanda kaminoetan

pauso geldiroz ibiltariak

autoak makal atzekaldean agonia bat

atzeko aulkian armak

aurrean gandua zaunka

 

lautada hitsak ogi artean belardi osoak

bost mila boltako erraiak

pasatze eten ezina lautada hitsetan

bazter batean arratsa istripuz hila

zapi zuriak leihatiletan

 

 

 

Deitorez eta amodio ase ezinez betetako bertso paperak hedatzen ziren airean

burdinesien barroteen kontra

hilotzen ezpainen kontra jausteko amoroski

ta puta erhail baten imintzioak kondatzen zituen ilargi hordi baten pean

gaua susaldi batez sorgindua legez habailtzen eta hiltzen hasi zen

erreteneko ur lohituen eskuetan

inongo doluminik gabe izarrik gabe

ta argia bertsoen puntu trinkoen artetik herrestan

kupida paperontzi hautsi bateko zakar erreetan utzia

                                                                            nagusitu egin zen

bertsoak norbaitek deituak bailiren puskatu birrindu

murgildu egin ziren zurubi traketsekiko lurpe arreetan

hezurren artera

harrek zilatu eta jan zituzten esperantzetan barrena

eta han hezea eta hotza ez zuten kausitu besterik

txapelik ez zuten kausitu

han etzan ta kornotea galdu

 

 

 

Hainbat gizon joanak dira zeruko ordekara

hainbat amodio

hainbat itzal eskuetan deseginak

eta Lurrak bere biran daramatza hegaztiak

hondogabeko aintzirak

 

non galdu ziren ezpainak

noiz lehertu ziren hodeiak jakitea

baso oinatz gabeak miatzea da

hire memoria iluna

eta dena

argi printzak pilatzea

zerbait eutsiz ekitea

besoetan ahanzten dira iraganak

ilargia bekokian iltzatzen da

ta zementuzko taupadak arratsetan

burdinezko irla batzuk begietan

esperantza baldosa bat

hainbat egun joanak dira memoriako harpeetara

beti basten ari dira garrateak

 

 

 

Hitz soilen bila nator

zuhaitz hosto ubelduen atzetik

aurpegi minduen ondora

horiengana nator

berriro eskuak bilutsik

bihotza odol goritan borborka

bizi daitekela uste izateko

 

ukimen gordin bila nator

hitzaren hondamendi aldera

jaiotzen direnen haragien bila

 

uretan etzatea nahi dut

haizetik ohostea burdinaren hotsa

maite ditudanen ahotsak

 

eskuak

hezurrak

sabelak

berreskuratzeari ekingo natzaio

konfetti multikoloreak ahanzteari

ta eskuz egiteari ametsak

 

berriro hodeiak eta ura miretsiko ditut

heriotz guztiak negartu

pauso geldiroen jabe apalak

                               tristeak

                               alaiak kantatu

hiztunekin hitzegin nahi dut

 

 

 

Aspaldidanik ura darie iturriei

zeruari haizea

eta ene zainei urteetako gogoa

 

                      badaki urak

                      badaki haizeak

                      gugana hurbiltzen denak

                      egunak mantso ahitzen direla

                      nekez maitea dena

 

                      badaki urak

                      badaki haizeak

                      gogoa urtu egiten dela

                      gure memoria haustua

                      nekez maitasuna

 

aspaldidanik ura darie iturriei

zeruari haizea

ene ezpainei zure izena

 



Literatur Aldizkarien Gordailua Susa argitaletxearen egitasmoa da.