L I T E R A T U R   A L D I Z K A R I E N
G O R D A I L U A

 

 
 

                   - Orrialde nagusira itzuli
                   - Vladimir aldizkaria
                   - Ale honen aurkibidea

                   - Ale honi buruzkoak (azalaren irudia eta fitxa)

Aurreko artikulua— Vladimir. 8. alea (1998-ekaina) —Hurrengo artikulua




 

 

Jose Luis Otamendi

 

Zurezkoa da zeru nabar hau, iltzeak ditu josita:

euria dakar.

Ibai ondotik nabil,

zaharrek eta umeek hartua dute ingurua,

argitasun bustia darie etxeei arratsean:

etorriko dira sasoi hobeak

baina ez ditugu geurekin ekarri,

haur baten negarrak egin dio ihes leiho altu bati;

euria dakar.

Etxeko sukaldetik bezala begiratzen diot jendeari

kalea:

gaur ezer gertatzen zaion

munduaren erdi-erdian suertatu naiz.

Behebarruetako hormak izerditan dira,

eta garai batean beti ondoan genuen

zu eroso eta lirikoa galdu zen

inoiz argitu gabeko modu ilun batean.

Mekanika hutsa baino ez du ematen bizitzeak

askotan,

baldintza tekniko soiletara errenditzea,

eta eder deritzogu euri tanten jauste bakan horri,

heltzear den ekaitzaren albiste da,

aldaketa baten aurrerapena,

eta aterpe bila hasten gara jendea.

Usaien errea zabaldu du asfaltuak:

Nire bihotza gordean da bakartu garenerako.

Falta direnak ditugu berriro gogoan,

Eta une batez baino ez dirudi urak ibaian gora egin duela,

euriak behetik gora, zerua bustitzera, egin duela, kontraera...

Bertsio ofizialik sinesten ez duen herri batekoa naiz.

 

In Dana lanbrotutte ikustot.

 



Literatur Aldizkarien Gordailua Susa argitaletxearen egitasmoa da.