Suposizio bat su-minetan

Goiz hartan BAT izan zen DENA.

Eta maitasunak

itxura berri bat eman zien

izaki guztiei.

Gure benetako izaera,

hastapeneko lotura ahaztua,

gogoratu nuen orduan,

eta iluna eta argiaren arteko

ezberdintasunaz ohartu nintzen.

Gero, arratsaldean,

trafikoaren zarataz

eta argi artifizialez inguratua

aurkitu nuen nere burua,

eguzkirik inoiz izan ez balitz bezala

bizi zen jendearen artean.

Hala,

egun berria etorriko zenaren ziurtasunaz,

hiri hura habitatzea

beste erremediorik ez nuela

iruditu zitzaidan.

Orain,

egunsentiaren zain,

hotzez,

kale ilunetan ibiltzen naiz,

farolen azpian gordez noizean behin,

berotu ninduen eguzki hura

egiazkoa ote zen

galdetuz nere buruari.