—Olerti—

Resurrexit

Orixe

                                Terraemotus magnus factus est. (Mt. XXVIII, 2)

                                Lurrikara aundia gertatu zan.

                                                                       (6 ta 6)

Poz aundiak dardar eragin oi dio gure biotzari.

Egun onetan, bai, poza sartu zaio lurrari berari...

Mendian ein dut lo. Argi-zirrintean zerk nau iratzarri?

Ego-aizea da. Beorrak irrintzi, laugainka, zabala

zalapartan dute alden-alde laister, ixil azkazala;

baña sail aundiak dardarazia du lurraren azala.

Eup! Nik dakit zer dan goizean mendian esnatzeko poza!

Oiean bildurik gelditu dan arek ez dezake goza

lurraren ikara, irrintzi aiekin laugaiñaren otsa.

Aurten Salvador' en, larunbat Gurenz, lur onek bost aldiz

dardar egin digu: emen pasa dira Aingeruak zaldiz.

Iru dardar txiki ta bi aundi ziran, iende dena baldiz! (1)

Zu zera nagusi, zeru, lur, ta lurpe. Ikara ta bildur

zeuden deabruak beren giltzapean. Emen ere kuzkur

iendea. Zuretzat zoro dabiltzanak, biurtzen dira zur.

Ez zan ikaratu il-obirakoan Maria Madalen;

ez ta Donibane, laisterka ioana Petiri baño len;

obi-zaiak, aldiz, ikara lauorriz, il antzeko zeuden.

Au poza! Onekin naigabeak oro estal dira gaiñez,

irrintzi, poz-dardar, lekaio ta laztan, txaloz ta mingaiñez.

Ar zagun atsegin! Iauna piztu baita, esana zigunez.

Piztuko gu ere. Iesusek zerua digu irabazi.

Egunero baratz, zeruko mugara urbilduz goazi.

Betor egun ua Iesus ikusteko. Il. Bai! Pizten asi!

(1) Gertatua, izan ere.