Ispiluko neskatila gaztea

Isidro Rikarte

Ispilu ixilari,

Eten gabe so ta so,

Neskatila gaztea,

Biluzik gorputz osoz.

Ispilu ixilean,

Jakinmin su ta malko,

Ari da isladatzen,

Biluzik gorputz osoz.

Begi berde gardenak,

Berde ilun edo urdinak,

Kresalaren distirak,

Dei bana bakoitzean.

Bi nahiontzi asetzeke,

Bietan gari-irri bat

Kasik ez zimurtua:

Buztinezko bi bular.

Larru txuri labaina,

Inoiz ez ukitua.

Bertan ezkerraihenek

utzi dute usaina.

Ispilu goikaldean,

Neskatila gazteak

Ikusten du edo amesten

kanpoko itsasoa.

Geldi geldi eta erne

Norbaiten zai legez,

Ari zaio kontatzen

Ametsa maiteminez:

"Bazetorrek.

Bazihoak

Ura alai

Uretara.

Harea hor

Itxaroten,

Urak berriz

Hartuko ote

Hartuko zai.

Zaldun,

Apardun,

Jauskari,

Uhin urdina,

Txuritzen hasia.

Harea dama,

Dama dotore,

Amore emana

Erakarri dik

Zaldun urdina.

Arin Arin

Estali dik

Gure zaldun

Urdinduak,

Aurrerantz txaaap,

Atzera orain.

Zaldun grina

Uretara.

Dama mutu

geratu duk".

"Etor hadi

Eta ez joan

Ene zaldun

Uretara.

Niagok geldi

Esperoan,

Bakardade

Itsasoan".