Kopla hauek bezalakoxea
da nire amodioa, inperfektoa

J. Azkona

Zure bularraren bistan

da nire kanpamendua,

bertan egonen naiz zelatan

egun ta gauak sartua.

Erauntsiak izan arren

eta trumoiek hots egin,

ez naute ja ere atzeratzen

nahi dizut aipu egin.

Goi ibiltari zalea

noakizu gorabide,

lanbro artean zure magala

niretzat zuzperbide.

Mundu zabaleko herriak

zurratu bapo haizeak,

menpera ezinezko bakarra

izan liteke zurea.

Larru leuna zurea

hi haiz eme eztitsua!,

opari gisara hortxe duzu

jaspezko eraztuna.

Ilunabarra heldu da

asetuak honenbestez,

haragiz bildu baikara biok

ekitearen ekitez.

Akiturik ta logale

batzar gaitezen ohera,

argia doakigu itzaltzen

gaua dugu aldartea.

Bizimodu katramila

bai gogorra eta latza!,

uste nuen baino hobeto nago

zuri honela lotuta.