Erdizka erdi hizka

Jean Louis Davant

Oraino ezin zaitut kantatu osoki

Hargatik egin zaitut erdi oneski,

Jende onak ez diten hortaz eskandala

Gure jansenismoa ez baita makala.

Euskadin badago

Ezin erran asko:

Gauza haundiago

Ta hitz gutiago.

Halere oro nahas ez dezagula.

Ez ditzagun bat egin Eros eta porno,

Uste zaharrez hortan gaude oraino.

Emazteen gorputzean ez dago zikinik,

Gure baitan da zerbait erditik eginik,

Gerrarenzalea,

Baliatzalea,

Pazentzi gabea

Bai ta herabea.

Salba Eros, burutik ondo gaudeno.

Euskaldunak ez duke aholku beharrik

Bainan Eros euskarak du arrozturik,

Detxepare, Oihenart, Bilintxez geroztik

Amaia ta Mikel,

Lurdes eta Lete,

Bestalde hainbeste

Ahazten dut ote

Eginbide ederra dutenak bete...

Zorionez Eros da ezin erosia,

Zoritxarrez da oso merkea.

Beharrik amodioz nago egosia,

Hargatik erraitea zait oso nekea.

Ez dira gailenak

Ene hastapenak.

Hobeak dirate

Agian hurrenak.

Hitz hauek ez dituzket araiz azkenak.

Kantaturenko zaitut, gogoko emazte,

Kantaturenko zaitut trebatu arte

Bai ta gero berriro, ahal bezain ongi

Ene bihotzaren ardu eta ogi

Begien gozoa,

Eskuen betea,

Ametsen atea,

Asmuen urzoa,

Adamen mirarizko lagun maitea.

Nahiz ez daitekean lur hortan Edenik

Beti mugitzen gaitu ezin edenak

Geroan ditugula egun ederrenak.

Baina boztutzen nuzu elgar eridenik

Munduko bidean

Ni zure aldean

Miretsirik nabil

Arantzen artetik.

Eba gabe Adamek ez du bakerik.