Txantxangorria negu atarian

Igartza'tar Eusebi, beneditarra

Adar mee baten dantxari,

Txan-txan-txan, txan-txan kantari,

Poz gaiñezka txantxangorri.

Muxu damaio eguzkiak,

ta ao xabalka, eztiki,

Kantuz eskertzen txoriak...

Biak maite miñ iduri.

Adar mee baten dantxari,

Txan-txan-txan, txan-txan kantari,

Poz gaiñezka txantxangorri.

Maitasun au ez betiko,

Ostoak doaz lurrera...

Negua aurki etorriko

Muxu..., kantua ixiltzera.

Adar mee baten dantzari,

Txan-txan-txan, txan-txan kantari,

Poz gaiñezka txantxangorri.

Txindoki'ren tontorrean

Ikus orduko elurra,

Ixilko une berean...

Ai, oni dion bildurra!

Bien bitartean dantzari,

Txan-txan-txan, txan-txan kantari,

Poz gaiñezka txantxangorri.

Laister zerua zatika

Zure gain, ai!, eroriko;

Orduan txantxangorrixka.

Ain alai, esan, biziko?

Bien bitartean dantzari,

Txan-txan-txan, txan-txan kantari,

Poz gaiñezka txantxangorri.

Otz dar-darka erdi illa,

Lumatxoak arro-arro

Zabiltzanean jan billa,

Ola, txoritxo, kantako?

Ibil, ba, ibil dantzari,

Txan-txan-txan, txan-txan kantari,

Ta negu on, txantxangorri!!