Meza berrian

Loidi'tar Paben

Oriotar bat San Inaziyo

egunarekin poztua,

aita ta amaren kabi goxotik

egatutzera dijua.

Amabi urte dira

joan zala Bitorira

utzirik ama gaixua.

Apaiz eginda etorri zaigu

Don Eujenio Zaldua.

Apaiz berriak udaberriko

txorikumien moduan

bi egotxuak zabaltzen ditu

aideratzeko asmuan.

Kabiya du eliza,

aldarean kaliza,

ardiak basamortuan.

Gaurtik aurrera Don Eujenio da

Kristoren apaiz munduan.

Orio'k izen aundia dauka

estropa eta pelotan,

apaizak ere sortzen dizkigu

orain len baiño geiotan.

Orregatik Orio

da gaur poza jario,

txaloka eta bertsotan.

Gaur bezelako pozik errian

ez da izaten askotan.

Apaizak dira arraunlariak,

Eliza dute batela...

Oiekin zintzo jo bear degu,

galdu giñake bestela.

Gurutze-ikurriña

irabazteko griña,

beti estropan bezela,

Oriotarra zeran aldetik

eraman zazu txapela.

Urte askuan konserba zazu

zeruak eman dizuna;

izanaz beti itsuen argi

ta beartsuen laguna.

Apala ta zintzua,

Jesus bezelakua,

ta ganera euskalduna.

Ori da gaurtik Elizak eta

erriak opa dizuna.