Bolibar

Basilio Iraola

Ego Amerika'ko

Erri berrietan,

Bolibar'en izena

Ezpain guztietan.

Aurrak bere amagandik

Entzun du askotan,

Amaika aldiz gero

Ikastol-aulkitan.

Bolibar, zure izena

Izar arrigarri,

Amaika beste izar

Dituzu estali.

Zuri begira daude

Begik adi-adi,

Egi-egiz zaitugu

Biotzen nagusi.

Baztar guztitan zuri

Txalo, gorasarrik,

Enparantzatan, berriz,

Arrizko idurik.

Biotz guztik dituzu

Maitetasun kabik,

Esku-beteka eskerrak

Zerura lurretik.

Amerika-lurretan

Aundiak mendiak,

Aien arteko ibaiak

Zabal ta luzeak.

Bolibar'tar Ximon, zuk,

Jo dituzu goiak,

Zure aunditasunak

Neurririk gabeak.

Gizaldi guztietan

Gizon berekoiak,

Oinperatu dituzte

Sendi ta erriak.

Bolibar, zuk urratu

Zenitun kateak,

Lengo morroi gaxoak

Gero nagusiak.

Ezpata eskubian,

Bitsa ezpañean,

Tximixta bezin azkar

Zaldian gañean.

Nunai agertzen ziñan

Gutxien ustean,

Etsai guztiak laister

Zerraldo lurrean.

Ajolik etzenion

Zere bizitzari,

Beti, lagundu nairik

Lotutakoari.

Orregatikan denak

Zure jarrailari,

Maitasuna zizuten

Askatzalle orri.

Bost Laterri aundiak

Zenitun askatu,

Kolonbi ta Bolibi,

Ekuador ta Peru.

Benezuela'ri ere

Kateak urratu,

Onela zure erria

Illobitik piztu.

Zure biotz-burutan

Gauza txiki ta aundik,

Denak zuten tokia,

Kate izan ezik.

Ezin zenun ikusi

Eskuak loturik,

Ez gizonikan eta

Iñungo erririk.

Espaindarren uztarri

Neketsu zitzaizun,

Ura askatutzeko,

Guda egin zendun.

Lurrak odolik asko

Ikusi izan zun

Baño alako batez

Pake ta askatasun.

Gudaketa aitatik

Guk bost aipatuko,

Isilik utzi bear

Beste asko ta asko.

Karabobo, Pitxintxa,

Junin, Ayakutxo,

Boyaka'ko zubian

Denak ondatuko.

Gudalburu ospetsu

Bolibar'tar Ximon,

Zu bezelakorikan

Eguzkipean, nor?

Gudari kementsua,

Odolez euskaldun,

Bost aberri dituzu

Askatasun zordun.

Olan eta mendiak

Zure berri dute,

Ibai eta zelaiak

Itzala dizute.

Zu il ziñanetikan

Negar-miñez daude,

Erri eta uriak

Goratzen zaituzte.

Zuk askatu zituzun

Senide jatorrak

Ameriketan denak

Dira zuretarrak.

Denak dakazkitzute

Lore txorta ederrak,

Maiteen zaituztenak

Kolonbia'tarrak.

Ereserki eder bat

Ezpain guztitatik,

Egunero jaikitzen,

Kolonbi lurretik.

Gure askatasuna

Zaindu iguzu goitik,

Kolonbi'tarrok ere

Denok gaude zutik.

Kolonbia guztia

Txaloka daukazu,

Euskaldunok aiekin

Bat egiten degu.

Gora, gora, Bolibar,

Gernika'ko kimu,

Denok alkar artuta

Goresten zaitugu.

Gora Kolonbia ta

Gora Euskal-erria,

Gora Benezuela,

Ximon'en erria.

Gora eusko abenda,

Erri arrigarria,

Arek sortu bai zuan

Olako semea.

Eutsi, Kolonbia,

Askatasunari,

Zure aunditasunak

Ura du iturri.

Ortarako begira

Anaitasunari,

Ta gurutze-besotan

Jositakoari.