Umeen lehenengo jaunartzea (1979)

Luis Baraiazarra

Jendez betea dago

Xemeingo eliza,

berak ematen digu

denoi geriza;

oraintxe entzun dugu

Jainkoaren Hitza

berak zuzendu dezan

guztion bizitza,

poztasun iturritik

edaten gabiltza.

Zuk hartu gaituzu ta

zabalik besuak

orain Zuretzat doaz

kantu ta bertsuak

jaio berri ginela

gure gurasuak

Zugana zuzendurik

txikion pausuak

geratu giñen kristau

mailara jasuak.

Gure aldetik dugu

bihotzeko pena:

sarri egin dugula

egoki ez dena;

baiña ondo dakigu

Zu ona zarena

ta eskaintzen diguzu

zure parkamena;

guretzako Zu zara

lagunik onena.

Zure taidearekin

azken afaritan

bihotza maitemiñez

zeunkan igaritan;

zerbait eman nahi eta

ardo ta ogitan

zatoz miragarrizko

Jainko janaritan;

geroztik hortxe zaude

Sakramentu hontan.

Denok sentitzen dugu

laguntza beharra,

zugandik datorkigu

zerutiko garra,

ta horrekin batera

maitasun indarra,

zurekin bizitzeko

biderik bakarra;

ez dugu iñoiz aztuko

oraingo batzarra.