|
Brouard tar Santi
Enbeita'tar Balendin
Izar haundi bat itzali jaku
Beraz milak piztutzeko
Ilunik dogun Euskal Herriko
Zerua argitutzeko.
Argian bila dabiltzazanei
Argi bide bat sortzeko
Brouard tar Santin jokabidea
Hor dogu eredutzako
Argi biderik onena baita
Gure garaitza lortzeko
Ezker ta eskubi anaitasunez
egiten zenduzan hartu
Haurrak osatu eta maitatu
Euskal giroan jorratu
Euskal baratzan emaitza zinan
Lore asko zendun sortu
Zure garaitzan jokabideaz
Etsaiak ziran bildurtu
Eta martiri hil zinduezan
Gero eskuak garbitu
Gudal buru bat hola hiltzea
Etsaiak ondo hartu du
Baina Santiren gudarosteak
Bildur gabe jarraitzen du
Hil eta gero tamal agurrak
Nahiz ta dabezan bidaldu
Santi nork hildun ez dogu zertan
Gonzaleztarrei itaundu
Eskuak zertan garbitu ez dira
Egin ezian zikindu
Santi izatez apala gendun
Borondatetsu ta umil
Baina herriko gora beheratan
Beti argi eta abil
Santiren jokabidean gaur be
Herria burrukan dabil
Bere heriotzak itxartu ditu
Andre, gizon, neska, mutil
Gudal buru bat hil dabe baina
Gudarostea ez da hil
Martiriaren odola dogu
bihar-etziko garaitza
Herri bizien espiritua
Eten gabeko emaitza,
Negu ta uda loretan dagon
Agortzen ez dan baratza
Herri hau hilda ikusi guran
Etsaia, alper zabiltza
indarrez ez dok lur bihurtuko
Aberri baten bizitza
Santi zanaren heriotziaz
Etsaia ez zaitez poztu
Bere odolez busti zan lurra
EUSKADI dala ez ahaztu
Lotan ziranak itxartu ditu
Erdi gaxoak osatu
Herriak orain Santiren lana
Egin orduan ezautu
Berak bezala askatasuna
Egiten dogu eskatu
Hobiratzian herri osua
zenduan zeure inguru
Zure iraultzan barruan bazan
Itxaropenaren Zeru
Santiren nahia beteko dauzku
Herri burrukak seguru
Esaten eban askatasuna
Dogula geure helburu
Gizon Euskotar jokatziagaz
Hori jaritxiko dogu
Ez dira inoiz lur bihurtuko
Brouard tar Santiren lanak
Martiri baten heriotziak
Argi dakuztaz ilunak
Gorroto beltza makaltzen daki
Eta sendotu gizonak
Gizon euskaldun eta abertzale
Beti aurrera Euskaldunak
Helduko dira sendiak aske
batuko geran egunak
| 
