Berandu etxeratzean

Gesalaga

Berandu etxera ta

gainera mozkorra,

zakurrak ekin dio

amorra-amorra,

ez da erreza lortzen

etxeko lehorra,

hortzak estutu

eta ate zaina horra!

Ondo ordainduko dut

edanaren zorra... (bis)

Gaur ere baietz hemen

niretzat kastigu,

galbidean ez gara,

ibili noski gu,

baina erretolika

latzak datozkigu,

andrearen sermoiak

ongi dakizkigu,

esanak esan arren

inportik ez digu. (bis)

Hala ere eraso

berriro zakurrak,

etxera sartu nahita

hor nago beldurrak,

—Lasaitu eta entzun

nire hitz samurrak,

isil zaitezen tori

txuleta hezurrak,

andreari esango

dizkiot gezurrak. (bis)

Zapatak erantzita

eskaileran gora,

argiak amatauta

ez dakigu nora,

trastetan estrapozu

eginda gerora,

andreak ni bota nau

etxetik kanpora,

eta lotara noa

txakurran ondora. (bis)