1940-ko gerla...

Batixta Borthiry-Salla

                             1

Himeretzü ehün eta berrogei gerren urthia,

Alemaniako armadak garhaitü dü Frantzia;

Hunki gabe ützi balü gure Eüskal Herria,

Nik enian phentsatüko berset hoien huntzia.

                             2

Zorthe gaitza Frantziako popüliarentako,

Bi miliu presu, eta bestiak esklabo;

Haien gaiñen ezdüt nahi deüsik erran haboro,

Libro-ago ... (1)

                             3

Nik entzüten düt erraiten gerla dela galdürik,

Bestek erran nahi die gü girela saldürik;

Tratü horren egiteko araus ezta gizunik,

Nula nahi izan dadin, guretzat ez deüs hunik.

                             4

Jüstizia galtho dago Frantziako jentia,

Sü-garretan dela dio ogendanten lekhia;

Tribünalak balü ere hentzat indüljentzia,

Jaunen Jaunak eginen dü azken jüjamentia.

                             5

Beste ororen gaiñetik hau da tristegarria,

Bi phartetan ezaririk Eüskal Herri maitia;

Sor lekhilat juaiteko zerratürik bidia,

Gaiaz ere ametsetan han düt phentsamentia.

                             6

Diala hogei ta bost urthe, gazte nintzan ordian,

Zunbait berset huntü nian presu Alemanian;

Hoik ere huntzen dütüt kasi planta berxian,

Minizatzera ez haizü, eta gosia sabelian.

                             7

Gai-aiñhera, abilua Alemanen gaiñeti,

Erran ezak Ziberuan hebenko zerbait berri;

Kuntsertatzen ahal bahiz ene adixkideki,

Jakin ere nahi nikek han direnez hobeki.

                             8

Lürrez hor Alemania, Angleterra huretan,

Orotako azkarrenak dira erresumetan;

Urgülliak erhotürik bat bada gizunetan,

Oihüz dio ari dela mündiaren hunetan.

                             9

Tuloneko mariñelak, orai zier uhure,

Amiralaren ordria hola ezpazen ere,

«Boche»-r ützi nahi gabez ehün untzi hoik ere,

Biba, ziek dotüzie denak hurpian gorde...

(1) Herroka hau kaier zolan deseginik da.