—Hitz neurtuak—

Poetika

Laura Mintegi

Bi eta bi

Bi eta bi

eta bi,

eta bi

eta beste bi

ez dira hamar,

bi batzuren multzoa baizik.

88.2.2

Ametsak

Badakit elkarrekin gaudenean

diferente dena

Badakit musu erdiak

hainbat isilune

eta keriatxo horiek

ez direna nire ametsak

Badakit gogoak diostana

begiek ezeustatzen dutena

Badakit, badakit guzti hori

badakit

Baina hilgo ditut

besterik ezean,

oraindik ditudan ametsak?

88.2.2

Bueltatu

Bueltatu

noiz utzi dudan

gogoratu ez arren

bertara

bueltatu

Norbait utzi nuen

ez badakit ere

lehen bait lehen

bueltatu

Ni hangoa naizelako

Agian norbait dagoelako

Bertara lehen bait lehen

bueltatu

Harria baino ez badago,

etxe baten hezurra,

musu ezkutuen oihartzuna,

agur hitsaren gogoramena,

ez badago ere

bueltatu

Nireak han daudelako.

Ni hemengoa ez naizelako.

87.4.19

Amaigabeko zuloan

Behar zaitudanik

ez izan zalantza

Harro agertzen banaiz ere,

uzten banauzu

amaigabeko zulo beltz

bihurturik geratuko naiz ni.

88.4.16

Uxatu behar

Ez naiz ari

beraren bila

Tristezia berez datorkit

Lagun goxo, epela

baina uxatu behar dut

nire aldetik.

88.4. 16

Oihu guztiak

Amodio, haserre,

etsipen eta pozaren

oihu guztiak

entzuten ditut nire gelan,

etxe osoko

pisu guztietako

telebista guztien

kanale guztietako

pelikula guztien

abotsak

batera

entzuten ditudanean.

88.2.2

Oinazea

Barnea dut gori

erraiak loturik

tiraka dabilkit

kanpotik oinazea,

sokatik tira,

tente eta gori

barneak estutuz,

haragia ito

nahi didala.

Nuen sentitu

gorputz dena epel

alde bakarrarekin solidario.

Bero dut orain aldea

minbizi zekena

oinazearen sukarretan hotz,

ziri, motz,

ekinzalea.

Gori gori dut barnea

mina eta grina

oihu kirrinkaria

haragi eraso ankerra

Su etengabea

erre gabe kiskali

ahitu egin didana

gogo dena.

Hemen nauzu

oinaze

ustekabean

harrapatu

nahi nauzun artean.

87.6.8