—Hitz neurtuak—

Kazarien atsedena

Gerardo Markuleta

                                        Como los erizos, ya sabéis, los hombres un día

                                        sintieron su frío; entonces inventaron el amor:

                                        el resultado fue, ya sabéis, como en los erizos.

                                                                                               L. Cernuda

Haragiaren

argi ikara:

hustu ezan denboraren kikara.

* * *

Arropak

gelaren eremuan, irla sakabanatuak:

bidaia luzerako jantzirik,

itsasoan barna,

goazeman.

* * *

Piztu ezan argi txikia,

gela huts honetan din

amaia munduak.

Lau begiok

ortzearen argi bakar,

haragizko muga oro,

goru koipetsuen biran.

* * *

                                Fereka geldian

                                                   umezurtz denbora.

* * *

                                Orratz-zizta leun:

                                          esna, zoratu itzan

zaldi lokartuak.

* * *

Zaldi ausart gaixo!

urra

errautsezko gortina

antigualeko amaraunak

eta hantxe duk aurkituko

zauri sendaezinaren zaporea.

                                Ezpainean ezpain,

                                                              sekula zapore.

                                Hondamen usaia,

                                                              erraietan etsai.

Gero, beti

itsasoaren isila,

ezin bestez,

elurtzaren bare gorra

jaungoiko izun baten beherako zuria bailitzen

galdera ikur baten inguruan.