Non ote dago Behiruth?

"azken finean bideak argituz doaz norberarentzat, gerrak munduko zoko guztietan dira eta bakoitzak BEYROUTHen edo Nikaraguan edota Gaintxurizketan borrokatu behar duen erabakitzen du..."

(XX. mendeko anonimoa)

        Udara zen guretzat laranja zumoa sortalde hurbileko egarriz inguraturik edaten genuen garaia. Udara zen egunkariko orrialdean ramadan kutsuz logabeko egunsentitan irakurtzen genituenean. Udara, bonben eztandek eguratsa sarraskitzen zutenean, han, Beyrouthen.

        Udarak inguratu zigun beroz eta egarriz erromantikotasun krudela. Argazkien atzean, alferrik, saiatu ginen bilatzen... eta baita elektrogailu denda aurrean erreportero ausartek lortutako imajin izugarri horien atzean. Arratsaldeko hirurak Alde zaharra kasi hutsik. Alboko lokalean, haurrak tragaperratan gerretara jostatzen, botoi bati sakatuz... Beste eztanda bat entzun da Beyrouthen.

        Non zegoen Beyrouth? Non, arrats gorria ikusteko asmoz Gaztelura igotzen ginenean...? Eta bapatean zeruaren zauri gorriak tristura sortzen zigunean.

        Urruti dago Beyrouth... Mediterraneora iritsi behar da eta gero gurutzatu. Hurbil zegoen Beyrouth, egunkariko lehen orrialdean, telebistako berrietan, irratiko teletipoetan. Eta fedayinen kanporatzearekin urrutiratu zen Beyrouth. Urruti dago Beyrouth.

        Gaua iristean, gelatik tren hotsa entzuten den bezala iritsi zitzaigun Beyrouthen negarraren oihartzuna... hurbil geneukan.

        Beyrouth nauzue, kai abandonatua, eta barkoak oroitzen direnean negar egiten dute; itsasbazter tristea naiz, eta nire hondarretan Heriok ondoren datorren poema beltza idatzi zuen:

        1975. urtean Mediterraneoaren sorbaldetan Beyrouth izeneko emakume eder bat zetzan... idatzi zuen Nizar Qabbani siriar poetak; guk 1982ko udaran ondorengo poemak idatzi genituen... baina, non ote dago geure Beyrouth?

Eneko O.

Metraila telebistan

eta haur begiek goruntz begiratzen dute

etorkizunean sinetsezinik

Lurrak bakarrik du etorkizuna

irakur daiteke eskonbro zati batean,

haurrak goruntz begira.

Makina baten zarata, oskorriak

artifizioz- ko laino ximelak,

artearen azken lorpena bilatu duten

hilotz barne odolkiak.

Heriotz txistuaren abisoa

artifiziozko suekin nahasten da,

haurrak goruntz begira nahiezean

eskua luzatzen diote lehen arnasari.

Vallejok haurrei hitzegin zien

haurrekin negar egin zuen,

Haur horien haurrek

Cesar Vallejogatik negar egiten dute.

Eta bienbitartean gu...

...kilometrotara

Beyroutheko malkoaren epistola

ezin idatzian gaude,

absurdoaren kronistak.

E.O.

Fedayin batzuk, militar jantziaz

Hamra kale erdian begiratzen dituzte

saltzaile baten maleta hutsak,

azken erromantikoen itxaropenak gordetzeko

maleta hutsak.

Elianek begiak gorriak ditu

bere etxe aurrean dauden zarama sutuengaitik,

Estrale Zineman bilatu zuen bart etxea,

israeldarren inbasio bezperan estreninatzailea

botatzen zuten.

Handik, bonben zarata urruti entzuten da

Akomodadore papera egiten duen miliziano batek

gordetzeko neurriak esaten ditu:

Hemen ez da erretzen, baju hitzegin, eta transistorean

berriak entzun nahi badituzu, egin ezazu mesedez, deskantsiloan

Baina Elianek,

Beyrouthen beste askok bezala, atzotik

gertatutakoaz hitzegiteko iragana erabiltzen du.

Maletek hutsik diraute,

tokia egiten borroka galdu guztiei.

Atzerrirako bidea

azken hiri erromantikoaren eskonbro gainetan.

...azken orduko albistea...

Mikel Antza

beyrouth sartaldea

uraren ordez hautsa

eta bost mila izar gehiago gauez

norien alboan

damasko irratian rock the cashbah

fedayinen auzunean ramadan

garorik gabeko basamortuak inguratzen du

sortaldeko beyrouth

hondarrezko gartzelan

itzalik gabe pasiatzen dira maiteminduak

norien alboan

barraka itxiek

ezinaren mugak laztantzen dituzte