Saio eternoa

F.E.

Begira ezan

akarra piztu dun

mutil bi borrokan

lotzerat ditun

herriko bestak, mutil da neskak

alkoholaz oro sutuak

taberna ketsu bat

estakuru bat falta zen eta ediren da

eta jadanik erantsi diten alkondara

gihartasun gazte eta urduri bana agertuz

zezen birena bezala.

Begira itzan

ze erronka sainak

ze hitz gordinak

elgarri jaurtikitzen dioten

jendeak ingurua egiten

dien bitartean, musika ezinago gora

tabernari xuhurrak baso garbituz zeharkako soa

eta begira ezan

inguruan neskatxek zer miresmen herabez

so dagiten, haien gorputz zainarten dardaraz

zer espantu ixil ez dagiten, desiozko uhin batek

nolaz bihotz zolaraino hunkitzen dituen, eta beldurrak ere,

deusik gertatuko ez den arren

deusik ez, zeren beti ukabilka

ez bezain luzea baitun birago eta irainen erretolika

itsusia, jedeak fienan bereizi egingo baititin

eta, erdeinu nabarmenez,

elegaixto murdukatzez

biak berdin garaile lekua hustuko baititen

Hara, so ezan, baziazin

zalapartan...

Bada orroa eta jestukeriaz barnago sar hadi orain

eta emaion gogoari

neska zenbait liluratu nahiz

borrokatu gazte bi izandu direla bi gazte hoik

edota, bestela esan, funtsean

errito zahar bateko sazerdoteak

tokia, arropak, edari moetak aldatuz geroz

mundua denaz geroztik beti berdin eta bat

izan den sedukzio saio eterno baten antzesleak...

Pentsu bitxiokin zu harritu nahiz

belarrira mintzo natzaizun hau

ber saioan zer paper antzesten ari naiz?